حدیث قدسی کے کیا معنی ہیں؟

استفتاء

حديث قدسی کے کیا معنی ہیں؟راہنمائی فرمائیں

الجواب :بسم اللہ حامداًومصلیاً

محدثین کی اصطلاح  میں حدیث قدسی  سے مراد وہ حدیث مبارک ہے جس میں  الفاظ حضور صلی اللہ علیہ وسلم کے ہوتے ہیں اور مضمون اللہ رب العزت کی طرف سے( بذریعہ وحی، الہام وغیرہ) ہوتا ہے۔چنانچہ سید علی جرجانی رحمۃ اﷲ علیہ  نے اپنی  تصنیف ” التعریفات” )صفحہ 83-84) میں حدیث قدسی کی تعریف کرتے ہوئے لکھاہے :

"هو من حيث المعنى: من عند الله تعالى، ومن حيث اللفظ: من رسول الله صلى الله عليه وسلم، فهو ما أخبر الله تعالى نبيه بإلهام أو بالمنام، فأخبر عليه السلام عن ذلك المعنى بعبارة نفسه

حدیث قدسی معنی کے لحاظ سے اﷲ رب العزت کی طرف سے اور الفاظ کے لحاظ سے رسول اﷲ صلی اﷲعلیہ وسلم کی طرف سے ہوتی ہے ۔پس یہ وہ کلام ہے جسے اﷲ تعالیٰ اپنے نبی علیہ السلام کو الہام یاخواب کے ذریعے بتائیں ۔ پھر آپ صلی اﷲعلیہ وسلم اپنے الفاظ میں اسے بیان فرمائیں  ۔نیزملاعلی القاری ؒ نے حدیث قدسی کی تعریف یوں کی ہے:

 "حدیثا یرویه صدر الرواة و بدر الثقات علیه افضل الصلوات و اکمل التحیات عن الله تبارک و تعالی تارۃ بواسطة جبریل علیه السلام وتارۃ بالوحی و الالهام و المنام مفوضا الیه التعبیر بای عبارۃ شاء من انواع الکلام وهی تغایر القران الحمید بان نزوله لایکون الا بواسطة الروح الامین و یکون مقیدا باللفظ المنزل من اللوح المحفوظ علی وجه التعیین ” (الاحادیث القدسیة الاربعینیة ص 10)

قرآن اورحدیث قدسی میں بنیادی فرق یہ ہے کہ قرآن میں الفاظ بھی اللہ تعالیٰ کی طرف سے ہوتے ہیں جب کہ حدیث قدسی میں الفاظ حضور صلی اللہ علیہ وسلم کے ہوتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم