طلاق کے الفاظ میں میاں بیوی کا اختلاف

استفتاء

بیوی کا بیان :

2021ء پانچویں  مہینہ کی بات ہے جمعہ کا دن تھا ۔ میری شوہر سے لڑائی ہوئی جس پر میں نے کہا کہ مجھے طلاق دے دو ۔وہ بھی غصہ میں تھا اس نے کہا (ہندکو زبان میں )  “اج وی  میں تو کو طلاق دے ساں کل وی دے ساں پرسوں وی دے ساں تو جل تو فارغ ہے “(آج بھی میں تجھے طلاق دوں گا ، کل بھی دوں گا ، پرسوں بھی دوں گا ، تو جا    تو فارغ ہے )۔

شوہر کا بیان :

جمعہ کا دن تھا  ۔ ہمارا جھگڑا  ہوا میری بیوی نے کہا مجھے طلاق دے دو ۔ میں نے غصہ میں کہہ دیا  “آپ کو طلاق ہے ، طلاق ہے ،طلاق ہے “

الجواب :بسم اللہ حامداًومصلیاً

مذکورہ صورت میں   شوہر کے بیان کے مطابق  تینوں   طلاقیں واقع ہو چکی ہیں ۔ جن کی وجہ سے بیوی شوہر پر حرام ہوچکی ہے لہٰذا  اب  نہ صلح کی گنجائش ہے اور  نہ رجوع ہوسکتا ہے ۔

توجیہ : مذکورہ صورت میں اگر چہ بیوی کا کہنا ہے کہ شوہر نے یہ الفاظ بولے تھے کہ   “اج وی  میں تو کو طلاق دے ساں کل وی دے ساں پرسوں وی دے ساں تو جل تو فارغ ہے”  جن میں شوہر نے مستقبل میں تین طلاقیں دینے کے ارادہ کا اظہار کیا تھا لیکن چونکہ طلاق  کا حق شوہر کو حاصل ہوتا ہے اس لیے اس معاملے میں شوہر کا قول ہی معتبر ہوگا، نیز شوہر کے اس اقرار میں اس کی اپنی ملکیت ختم ہورہی ہے اس لیے شوہر کے حق میں یہ اقرار معتبر ہوگا۔

مبسوط سرخسی (6/23) میں ہے:

لأنه ‌في ‌إيقاع ‌الطلاق هو مستبد به

مبسوط سرخسی (25/74) میں ہے:

وإقرار صاحب الحق ‌معتبر ‌في ‌حقه لا محالة فإذا أقر أنه [أي العبد] حر لم يكن له على أخذ  الرقبة سبيل

تنویر الابصار (4/448) میں ہے :

‌صريحه ما لم يستعمل إلا فيه  كطلقتك وأنت طالق ومطلقة ويقع بها واحدة رجعية،

وإن نوى خلافها أو لم ينو شيئا  و قال الشامي : (قوله او لم ينو شيئا) لما مر ان الصريح لا يحتاج الي النية

‌شامی (4/501) میں ہے :

كرر ‌لفظ الطلاق وقع الكل، وإن نوى التأكيد دين

(قوله ‌كرر ‌لفظ الطلاق) بأن قال للمدخولة: أنت طالق أنت طالق أو قد طلقتك قد طلقتك أو أنت طالق قد طلقتك أو أنت طالق وأنت طالق ………….قوله وإن نوى التأكيد دين) أي ووقع الكل قضاء

بدائع الصنائع (3/295) میں ہے :

وأما الطلقات الثلاث فحكمها الأصلي هو زوال الملك، وزوال حل المحلية أيضا حتى لا يجوز له نكاحها ‌قبل ‌التزوج بزوج آخر؛ لقوله عز وجل {فإن طلقها فلا تحل له من بعد حتى تنكح زوجا غيره}

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم