گناہوں سے بچنے کے بارے میں  نذر ماننا

استفتاء

اگر کوئی شخص گناہوں میں مبتلا ہو اور اللہ سے منت مانے کہ اے اللہ مجھے گناہوں سے نجات دیدے تو میں صدقہ کرونگا اور صدقہ کی تعیین نہیں کی تھی کہ کیا صدقہ کروں گا۔تو کیا منت فوری واجب ہو جاتی ہے؟

وضاحت مطلوب ہے کہ: کسی خاص گناہ سے بچنے کیلئے منت مانی تھی یا مطلقا گناہوں سے بچنے کیلئے منت مانی تھی؟

جواب وضاحت: خاص گناہ سے بچنے کیلئے منت مانی تھی۔

الجواب :بسم اللہ حامداًومصلیاً

مذکورہ صورت میں  اگر اس گناہ سے اس وقت بچ گئے ہوں جس وقت نذر مانی تھی تو دس مسکینوں کو کھانا کھلانا ہو گا۔اور بہتر یہ ہے کہ فوراً  دس مسکینوں کو کھانا کھلا دیں ورنہ زندگی میں جب بھی ادا کرے گا ادا ہی ہوگا۔

تنویر الابصار مع در المختار(537,538/5) میں ہے:

( ومن نذر نذرا مطلقا أو معلقا بشرط وكان من جنسه واجب ) أي فرض كما سيصرح به تبعا ل ( البحر ) و ( الدرر ) ( وهو عبادة مقصودة ) خرج الوضوء وتكفين الميت ( ووجد الشرط ) المعلق به ( لزم الناذر ) لحديث من نذر وسمى فعليه الوفاء بما سمى ( كصوم وصلاة وصدقة ) ووقف ( واعتكاف ) ( ولم يلزم ) الناذر ( ما ليس من جنسه فرض كعيادة مريض وتشييع جنازة ودخول مسجد)

مسائل بہشتی زیور (181/2) میں ہے:

مسئلہ:  اگر کسی نے فقط اتنا کہا کہ میرے ذمہ نذر ہے اور کچھ نیت بھی نہیں کی تو قسم کاکفارہ دے اور اگر نیت کی تھی تو اگر روزے کی نیت کی تھی تو تین روزے رکھے اور اگر صدقہ کی نیت کی تھی تو دس مسکینوں کو کھانا کھلائے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم