حدیث” جو دن رات میں بیس مرتبہ موت کو یاد کرے اس کا حشر شہید کے ساتھ ہوگا” کی تحقیق

استفتاء

حضرت عائشہ رضی اللہ عنہا نے پوچھا : یارسول اللہ ﷺ ! کسی کا حشر شہیدوں کے ساتھ بھی ہوگا ؟ آپ نے فرمایا، ہاں ، جو شخص دن رات میں بیس مرتبہ موت کو یاد کرتا ہے وہ شہید کے ساتھ اٹھایا جائے گا ۔(جمع الجوامع 2/14 رقم الحدیث 356)

اس حدیث  کے حوالے سے تفصیل مطلوب ہے کہ آیا یہ حدیث موضوع ہے ضعیف ہے یا صحیح ؟ جمع الجوامع کے علاوہ حدیث کی کسی اور کتاب میں بھی یہ حدیث موجود ہے یا نہیں ؟ اہل علم سے رہنمائی چاہیے ۔

الجواب :بسم اللہ حامداًومصلیاً

یہ روایت انہی الفاظ کے ساتھ قوت القلوب لابی طالب مکی(1/410) ، احیاء علوم الدین للغزالی(2/385) میں  بغیرسند کے مذکور ہے اورچونکہ ہمیں اس روایت کی سند نہیں ملی اس لئے اس متعلق کچھ نہیں کہا جاسکتا۔البتہ یہی مضمون ایک  دوسری روایت میں مروی ہے یہ روایت معجم الاوسط للطبرانی(رقم الحدیث7891)میں ہےاوراس  کے الفاظ یہ ہیں  :

عن عائشة ، قالت : قلت : يا رسول الله ، ليس الشهيد إلا من قتل في سبيل الله ، فقال : « يا عائشة ، إن شهداء أمتي إذا لقليل ، من قال في يوم خمسة وعشرين مرة : اللهم بارك في الموت ، وفيما بعد الموت ، ثم مات على فراشه ، أعطاه الله أجر شهيد ۔

یہ روایت سند کے اعتبار سے ضعیف ہے تاہم اسے فضائل میں بیان کیا جاسکتا ہے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم