نظر بد سے بچانے کے لئے ٹیکا لگانا

استفتاء

سوال :بچوں کو نظر بد  سے بچانے کے لئے ان کی پیشانی کے کنارے پر یا چہرے پر کالا ٹیکا لگانا شرعاً جائز ہے یانہیں ؟

الجواب :بسم اللہ حامداًومصلیاً

بچو ں کو نظر بد سے بچانے کے لئے ان کی  پیشانی  کے  کنا رے پر  یا چہرے  پر کا لا ٹیکا  لگا نا  جائز ہے بشر طیکہ ایسا کرنے سے  غیر مسلموں کے ساتھ  مشا بہت  نہ ہو   ۔

شرح السنۃ للبغوی (12 /166 ) میں ہے:

وروي أن عثمان رأى صبيا مليحا، فقال: دسموا نونته كيلا تصيبه العين.

ومعنى دسموا، أي: سودوا، والنونة: الثقبة التي تكون في ذقن الصبي الصغير

فتاویٰ محمودیہ(20 /82)  میں ہے :

سوال :بچوں کے چہرہ  پر سیاہ  داغ  نظر بد  سے حفاظت کےلئے  لگانا درست ہے  یانہیں ؟

الجواب حامدًاومصلیاً:یہ کوئی شرعی چیز نہیں ہے   نظر کا لگ جانا حق اور ثابت ہے  حدیث  پاک میں   موجود ہے  ۔ اس سے حفاظت کے لئے  جو علاج  و تدبیر  تجربہ  سے ثابت  ہو  اس کا اختیار کر نا  درست  ہے جب کہ اس میں کسی  ناجائز  چیز   کا ارتکاب نہ ہو   ۔  اگر یہ غیر  مسلموں کا طریقہ وشعار   ہو تو اس سے  بچنا  چاہیے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔     ۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم