’’اگر تم نے فلاں لڑکے سے بات کی تو تم مجھ پر طلاق ہوگئی ہو،  طلاق ہوگئی ہو، طلاق ہوگئی  ہو‘‘ کہنے کا حکم

استفتاء

بیوی کا بیان:

ہماری منگنی  اور نکاح پچھلے شوال میں ہوااور اس کے دو ماہ بعد رخصتی ہوگئی  رخصتی  کے بعد اگلے دن  ہماری لڑائی ہوگئی اور میرے شوہر نے مجھے ایک لڑکےسے بات کرنے سے منع کرتے ہوئےکہا  کہ”   اگرتم نے فلاں لڑکے سے بات کی   تو تم مجھ پر طلاق  ہوگئی ہو،طلاق ہوگئی ہو، طلاق ہوگئی ہو” پشتو کے الفاط یہ ہیں (کہ تا چیرے ھغہ ھلک سرہ خبرے اوکڑے نوتہ ما باندے طلاقہ  شوی یی، طلاقہ شوی یی، طلاقہ شوی یی”۔ اس کے تقریبا 13 دن بعد یہ شرط ٹوٹ گئی اور میں نے اس لڑکے سے بات کرلی اور اس کے 10دن بعد ہم آپس میں ملے چونکہ ہم مسئلے کو خفیہ رکھنا چاہتے ہیں اس لیے تاخیر سے گھر  سے نکلنے کا موقع   ملنے پر ہم مسئلہ پوچھ رہے ہیں  ۔ایک مفتی صاحب  نے بتایا    ہے کہ حلالہ کے بغیر تمہارا نکاح نہیں ہوگا۔

شوہر کا بیان:

میں اپنی بیوی کے بیان سے متفق ہوں نیزمیری بیوی نے  اس لڑکے سے لڑنے کےلیےبات کی ہے یعنی بات کرنے کی وجہ لڑائی تھی دوسری  وجہ نہیں تھی ۔

الجواب :بسم اللہ حامداًومصلیاً

مذکورہ صورت میں شوہر نے جب     بیوی سے   کہاکہ”اگر تم نے فلاں لڑکے سے بات کی تو تم مجھ پر طلاق  ہوگئی ہو،طلاق  ہوگئی ہو،طلاق ہوگئی ہو” تو اس سے تینوں طلاقیں اس لڑکے سے بات کرنے کی شرط  پر معلق ہوگئیں  اس کے بعد  جب  یہ   شرط  پائی گئی   یعنی بیوی نے اس لڑ کے سے بات  کرلی توتینوں طلاقیں واقع ہوگئیں جن کی وجہ   سے بیوی شوہر پر حرام ہوگئی لہذا اب نہ صلح ہوسکتی ہے اور نہ رجوع کی گنجائش ہے ۔ تین طلاقوں کے بعد چونکہ میاں بیوی کا اکٹھے رہنا  اور ملنا جائز نہیں تھا اس لیے میاں بیوی اس پر توبہ و استغفار کریں اورفوراً علیحدگی اختیار کریں۔

فتاوی عالمگیری (2/317) میں ہے:"وإذا أضافه إلى الشرط وقع عقيب الشرط اتفاقا مثل أن يقول لامرأته إن دخلت الدار فأنت طالق”در مختار (4/509) میں:"فروع کرر لفظ الطلاق وقع الکل وإن نوى التأكيد دين "فتاوی عالمگیری (2/411) میں ہے:"وإن كان الطلاق ثلاثا في الحرة وثنتين في الأمة لم تحل له حتى تنكح زوجا غيره نكاحا صحيحا ويدخل بها ثم يطلقها أو يموت عنها كذا في الهداية”فتاوی شامی(4/450) ہے:"ومن الألفاظ المستعملة : الطلاق يلزمني ، والحرام يلزمني ، وعلي الطلاق ، وعلي الحرام فيقع بلا نية للعرف”

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم