حیض کی حالت میں قرآن مجید کی تلاوت کا حکم

استفتاء

(1)۔حیض کے ایام میں عورت قرآن مجید کی تلاوت کرسکتی ہے ؟

(2)۔کیا ایسی حالت میں قرآن مجیدکو چھونا جائز ہے؟

(3)۔کیا ایسی حالت میں حفظ کیا جاسکتا ہے اسکی کیا صورت ہوسکتی ہے ؟

(4)۔موبائل یا لیپ ٹاپ پر سبق یا د کیا جاسکتا ہے یا نہیں ؟

احادیث اور فتاوی کی روشنی میں جواب چاہیئےجزاکم اللہ

الجواب :بسم اللہ حامداًومصلیاً

(1)۔نہیں کرسکتی ۔

(2)۔جائز نہیں ہے ۔

(3)۔قرآن پاک پڑھنے کی اجازت نہیں البتہ قرآن سن سکتی ہے اور زبان سے پڑھے بغیرصرف دیکھ بھی سکتی ہے اور الفاظ کو توڑ توڑکر بھی پڑھ سکتی ہے ۔

(4)۔زبان سے روانی سے تو نہیں   پڑھ سکتی البتہ اوپر ذکر کردہ طریقے سے کیا جاسکتا ہے ۔

سنن ترمذی (رقم الحدیث :131) میں  ہے

عن ابن عمر رضى الله عنهما عن النبي صلى الله عليه وسلم: ((لا تقرأ الحائض ولا الجنب شيئامن القران ))

ترجمہ:حضرت ابن عمر رضی اللہ عنہ  نبی کریم ﷺ سے روایت  کرتے ہیں  کہ حائضہ اور جنبی قرآن میں سے کچھ  بھی نہ پڑھے۔

المعجم الکبیر الطبرانی  (رقم الحدیث:13216) میں ہے

عن عبدالله ابن عمر رضى الله عنه أن رسول الله صلى الله عليه وسلم قال:((لا يمس القرآن الا طاهر ))

ترجمہ: حضرت ابن عمر رضی اللہ عنہ  نبی کریم ﷺ سے روایت  کرتے ہیں  : کہ قرآن کو صرف پاک  لوگ چھوسکتے ہیں ۔

فتاوی ہندیہ (1/71)  میں ہے

(ومنها حرمة قراءة القرآن) لا تقرأ الحائض والنفساء والجنب شيئا من القرآن  والآية وما دونها سواء في التحريم على الأصح….وإذا حاضت المعلمة فينبغي لها أن تعلم الصبيان كلمة كلمة وتقطع بين الكلمتين ولا يكره لها التهجي بالقرآن كذا في المحيط….ومنها حرمة مس المصحف لا يجوز لهما وللجنب والمحدث مس المصحف إلا بغلاف متجاف عنه كالخريطة والجلد الغير المشرز لا بما هو متصل به هو الصحيح هكذا في الهداية وعليه الفتوى كذا في الجوهرة النيرة والصحيح منع مس حواشي المصحف والبياض الذي لا كتابة عليه هكذا في التبيين,…. ولا يكره للجنب والحائض والنفساء النظر في المصحف هكذا في الجوهرة النيرة.

مسائل بہشتی زیور(1/113) میں ہے

مسئلہ :لڑکی حفظ کررہی ہواور اس دوران اس کو حیض آنا شروع ہوجائے تو حیض کے دنوں میں قرآن پاک نہ پڑھے ۔پڑھا ہو ا یا درکھنے  کےلیے دو طریقے ہوسکتے ہیں

1۔کپڑے وغیرہ سے قرآن پاک کھول کربیٹھےاور قلم وغیرہ کسی چیز سے ورق پلٹائےاور قرآن پاک میں دیکھ کر دل دل میں پڑھے زبان نہ  ہلائے۔

2۔کوئی تلاوت کررہا ہواس کے پاس بیٹھ جائے اور سنتی رہے  سننے سے بھی یا د ہوجاتا ہے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم