کیا یہ صحیح بخاری کی حدیث ہے؟

استفتاء

نبی مکرم ﷺ نے ارشاد فرمایا کہ میری امت جنت میں جائے گی  سوائے اس کے جس نے جنت میں جانے سے انکار کیا صحابہ رضی اللہ عنہم  نے سوال کیا اے اللہ کے رسول ﷺ کون ہے جو جنت میں جانے سے انکار کرے ؟ آپ ﷺ نے فرمایا جس نے میری اتباع کی (سنتوں پر عمل کیا) وہ جنت میں جائے گا اور جس نےمیری نافرمانی کی ( میری سنت سے منہ پھیرا سنت کو نہ اپنایا) اس نے ( جنت میں جانے سے) انکار کردیا  ۔

تصدیق فرمادیں ، کیا یہ حدیث صحیح بخاری میں ہے ؟

الجواب :بسم اللہ حامداًومصلیاً

یہ حدیث صحیح بخاری ، کتاب الاعتصام بالکتاب و السنۃ ، باب الاقتداء بسنن رسول اللہ ﷺ  (رقم الحدیث 7280)میں موجود ہے ۔حدیث کی عبارت اور ترجمہ اس طرح ہے :

 عن ابي هريره رضي الله عنه ان رسول الله صلى الله عليه وسلم قال : ” كل امتي يدخلون الجنة إلا من ابى” قالوا: يا رسول الله، ومن يابى؟ قال : من اطاعني دخل الجنة، ومن عصاني فقد ابى”۔

’’حضرت ابوہریرہ رضی اللہ عنہ سے روایت ہےکہ رسول اللہﷺ نے فرمایا : ” میری ساری امت جنت میں جائے گی سوائے ان کے جنہوں نے انکار کیا”۔صحابہ رضی اللہ عنہم نے عرض کیا : یا رسول اللہ! کون(جنت کا)انکار کرے گا؟  آپﷺ نے فرمایا : "جو میری اطاعت کرے  وہ جنت میں داخل ہو گا اور جس نے میری نافرمانی  کی تو  اس نے (گویا جنت کا)انکار کیا۔“

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم